相招來咱議員服務處算命哦！

來哦，緊來哦！樓頂招樓跤，阿母招阿爸！鬥陣來去咱周議員的服務處，聽講佇遐有咧共人看風水兼算命，毋管囡仔出世欲號名、少年的冊讀無常在予老師罰徛、奧巴桑佮厝邊冤家犯人khia，抑是小姐驚隔壁彼个阿那答毋睬我、大哥愛賣啥物才會較好額、老歲仔過身愛扛去埋佇tah，攏會共你報1支名牌，毋是，報1條明路，無準毋免錢！．．．哦，啥物？本底就無收錢！歹勢，講傷緊去矣，攏總免費還閣欲送恁去Hawaii．．．遮無哦！．．．救人哦．．．
咱服務處特別有交待，若紅嬰仔漏青屎、豬仔毋食phun，著愛tshua去揣先生，毋通共囡仔抱來、豬仔牽來咱服務處he，按呢著行毋對所在去矣。
來啦，來啦，看是江翠國中的樹仔會徙走無？游泳池會起--起-來無？抑是地下停車場會共挖--落-去無？攏會使來算看覓。上重要的，愛共師父請教咱議員後屆會閣高票當選無啦？
啊咱議員趁偌濟哦？遮算無啦，問伊本人較緊！
猶閣有免費的「法律諮詢」服務予恁去佮厝邊告無驚的！毋過，若欲為著樹仔佮議員告輸贏的，著毋通來e！
恁若無利便來服務處，敲1个電話來嘛會使，阮照常為恁服務甲好勢仔好勢，會記持敲電話22553341，外埔頭愛加1个02，若海外閣再加886，毋通袂記。
這馬是「網路新世代」，咱議員嘛足綴會著時代，來咱「 周勝考議員服務園地」部落格的「我要留言」，共阮講恁的需要，仝款「百分之百」服務「不打折」哦，那無，「我做錯了，我下台，你們不要選票給我。」


風水命理服務時段(資料來源：周勝考議員服務園地)